Leteroj

Über den Wolken

... muss die Freiheit wohl grenzenlos sein. („Super la nuboj la libereco supozeble senlimas”. El kanto de Reinhard Mey, germana muzikisto).

La artikolo Aviadilaj 5G-aparatoj: novaĵoj por eŭropaj vojaĝantoj (MONATO 2023/04, p. 21) raportas pri novaj EU-reglamentoj pri la uzado de aparatoj en aviadiloj. La verkanto asertas: „tiu nova teknologio estos grava por faciligi la dumflugan vivon”.

Miaopinie faciligoj de la dumfluga vivo ĉi-tempe ne estu tre altranga celo teknologia aŭ leĝa. Aprobiĝu pliaj EU-reglamentoj. Atingu tiuj reglamentoj efektivan kaj progresontan malpliigadon de la suma damaĝo ĉiujare, ĉiulande kaŭzata de la flugvojaĝoj. Tiaj reglamentoj estus vere grava kaj festinda sukceso, ĉar pli da loĝebla planedo restus: vera leĝa ilo por „igi (flug)vojaĝadon pli senzorga”! Tiam aviadilaj 5G-iloj fariĝus agrablaj novaĵoj.

Dankegon al Leonardo Araya pro la najbara artikolo Klimatŝanĝiĝo kaj incendioj detruis sudan Ĉilion! (MONATO 2023/04, p. 23)