Politiko

DATREVENO

Marco Pannella: la ribela filo de la itala politiko

Marco Pannella, unika kaj tre pridebatata figuro en la itala politiko, estis unu el la fondintoj kaj historiaj gvidantoj de la itala radikala movado. Naskiĝinte en 1930 en Teramo (Abruco, Italio), Pannella estis senĉesa aktivulo, fama pro sia kuraĝa kaj ofte provokema batalado por civitanaj rajtoj kaj individuaj liberecoj.

Lia politika engaĝiĝo karakteriziĝis per serio de kampanjoj pridiskutataj, fojfoje por tiu tempo skandalaj. Pannella estis sendube konata kiel rezoluta apoganto de eŭtanazio, leĝa permeso por la uzo de „molaj” drogoj, pli da rajtoj por samseksemuloj kaj abortigo. Por defendi siajn ideojn, li ofte turnis sin al ekstremaj metodoj, kiel malsatstriko kaj soifstriko, kio ofte altiris la atenton de la politika mondo kaj de la publiko rilate al liaj petoj kaj proponoj. Tiuj radikalaj agoj estis laŭdataj kiel ekzemploj de civila kuraĝo, sed ankaŭ foje kritikataj kiel tro provokemaj.

Marco Pannella laboris senĉese por la aprobo de leĝoj, kiuj alportu amnestion al politikaj malliberuloj kaj reformon de la juĝsistemo, celante pli grandan socian kaj civilan justecon.

Krom siaj politikaj bataloj, Pannella fervore subtenis Esperanton. Lia intereso pri la lingvo bone reflektis lian vizion pri unuiĝinta kaj interkonektita mondo, kongruanta kun lia engaĝiĝo pri tutmonda homrajtismo. La Partio Radikala, sub lia instigo, aktive partoprenis en la disvastigo kaj antaŭenigo de Esperanto dum la 80aj kaj 90aj jaroj de la pasinta jarcento, rigardante ĝin kiel potencialan solvon por internacia komunikado kaj kiel ilon por atingi pacon kaj kunlaboron inter la diversaj nacioj. Pannella rigardis Esperanton rimedo por plifaciligi dialogon inter popoloj kaj pli bonan komprenon inter homoj: temis pri perspektivo kongruanta kun liaj idealoj de batalo por homaj kaj civilaj rajtoj mondskale.

Lia rilato kun la romkatolika eklezio estis, male, tre kompleksa kaj ofte konflikta. Kvankam li kreskis en konservativa romkatolika medio, li maturigis forte kontrastantajn opiniojn rilate al la tradicia doktrino de la eklezio pri temoj kiel abortigo kaj kontraŭkoncipo. Emma Bonino, alia ŝlosila figuro en la itala radikala politika scenejo, kunhavis multajn batalojn kaj idealojn kun Marco Pannella, laborante proksime al li ene de la itala radikala movado por plibonigi homajn kaj civitanajn rajtojn en lando, kie la influo de la eklezio, aŭ precize de ĝiaj plej konservativaj branĉoj, estis ankoraŭ granda.

Marco Pannella forpasis la 19an de majo 2016 en Romo, lasante fervoran aktivisman markon en la historio de la maldekstrema itala politiko. Sian tutan vivon li dediĉis al batalo por civitanaj rajtoj kaj pli justa, libera socio, iĝante signifa figuro en la itala politika scenejo de la 20a jarcento.