Leteroj

Dankon al Julius Hauser, sed ne nur

Mi deziras skribi al la redaktantoj de MONATO por esprimi mian kontenton: vere interesaj artikoloj. Kontribuo, kiu ne nur interesis min, sed eĉ instruis al mi ion, estas la artikolo pri Olaf Scholz suspektata pri malhonestaj financaj agoj. Tiun informon mi ne estis leginta en franclingva ĵurnalo. Nu, ni simplaj civitanoj ne plu emas fidi al profesiaj politikistoj! Grava danĝero por demokrataj sistemoj.

Per kiuj kriterioj ni povas decidi, ĉu artikolo estas interesa aŭ ne?

1/ Ĝia temo estu interesa; ĝi malkovru al ni ion nekonatan, malkovrante realaĵojn de aliaj landoj. Tial dankon al la korespondantoj, kaj precipe al tiuj de landoj tute ne konataj de mi: Indonezio, Japanio, Ĉinio, Ĉilio ktp.

2/ Ĝi alportu al ni informon kaj pripensadon. Por tio plej elstaras la artikoloj de nia diplomata emerito, Julius Hauser. Ĉiuj liaj artikoloj alportas analizadon. En la lasta (pri Kongo) li bone substrekis la katastrofan situacion de eks-Zairo, poluita de korupto, lando pri kiu tre malofte parolas amas-informiloj, male al Ukrainio. Sed je mia opinio li tro substrekis la etnan aspekton (ekzemple tucioj venĝas sin kontraŭ hutuoj) kaj ne sufiĉe montris la gravecon de ercoj (koltano, kobalto ktp). Ĝuste tiuj riĉaĵoj allogas internaciajn kompaniojn kaj iliajn registarojn.