La 7an de septembro 2019 en Parizo okazis futbalmatĉo Francio-Albanio. Laŭregule oni aŭdigas la naciajn himnojn de ambaŭ landoj – unue, tiun de la gasto, ĉi-okaze de Albanio.

Konfuzo

Sed, strange, ĉiuj 80 000 spektantoj aŭdis ĝisfine la himnon de Andoro! Albanoj protestis ĉe la ĉefarbitracianto, kaj tiu ĉi, siavice, ĉe la organizantoj. Post kvar minutoj, la parolisto, pardonpetante, anoncis la himnon de ... Armenio!

Pardonpetis eĉ la prezidento

Finfine, pli grava persono repardonpetis, kaj la spektantoj aŭdis la albanan himnon – stare, tiel esprimante, ankaŭ ili, sian pardonpeton je la nomo de la franca popolo. Tion faris oficiale, du tagojn poste, ankaŭ la franca prezidento Emmanuel Macron en sia mesaĝo al la albana ĉefministro Edi Rama.

Dufoja eraro vekis disputojn

Tiu ĉi malagrabla okazintaĵo vekis disputojn en Albanio. Ĉu ĝi estis vere senintenca homa eraro okazinta dufoje aŭ ies fiintenca ago?

Cetere, oni eksciis, ke UEFA monpunis la francan futbalan federacion je 10 000 eŭroj.

Bardhyl SELIMI

korespondanto de MONATO en Albanio

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 12, p. 7.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2020-07-07