MONATO
Por skribi al ni
Serĉi en MONATO

Moderna vivo

AŬSTRIO

Ŝtala tegmento por fera vojo

La tegmento de la nova viena ĉefstacidomo, konstruita el 14 romboj, imponas. Ĝi konsistas el 7000 tunoj da ŝtalo: por la 312 metrojn alta pariza Ejfela Turo, finkonstruita en 1889, oni bezonis nur iom pli (7300 tunojn). La stacidoma areo estas 31 000 m 2, la longeco 200 m, la larĝeco 120 m.

Uzante la stacidomon, la pasaĝero tuj profitas. Oni ne plu devas alveturi la iaman Sudan Stacidomon, iri centon da metroj kaj atendi en la apuda Orienta Stacidomo. Nun oni povas komforte ŝanĝi trajnojn ĉe la sama kajo aŭ povas eĉ simple traveturi la stacidomon post mallonga halto.

De la nova stacidomo oni veturas rekte al multaj urboj en Aŭstrio kaj en eksterlando: Zuriko, Munkeno, Frankfurto, Prago, Budapeŝto, Zagrebo, Venecio, Varsovio, Beogrado, Romo, Berlino, Bukareŝto kaj aliaj.

Pintaj horoj

La stacidomon uzas ĉiutage 145 000 pasaĝeroj. Dum la pintaj trafik-horoj en ĉiu minuto alvenas aŭ forveturas unu trajno. Ĉiutage uzas la stacidomon entute 1100 trajnoj.

La stacidomo kostis unu miliardon da eŭroj, precize la sumon, kiun oni kalkulis laŭ la ofertoj. Tio rimarkindas, ĉar dum la konstrutempo – de 2011 ĝis 2015 – unu granda konstrufirmao fariĝis ne plu solventa.

 

Ankaŭ la dutraka fervojlinio de la ĉefstacidomo rekte al la flughaveno estas parte nova. Por ĝi oni devis, super la centra ranĝostacio, konstrui 200 metrojn longan ponton, por kiu oni bezonis 2300 tunojn da ŝtalo.

Walter kaj Renate KLAG
korespondantoj de MONATO en Aŭstrio
   
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Walter kaj Renate Klag el MONATO (www.monato.be).

Lasta adapto de tiu ĉi paĝo: 2020-07-07