MONATO
Por skribi al ni
Serĉi en MONATO

Moderna vivo

BESTOJ

Ŝafhundo senlima

Ŝi povas distingi 340 objektojn kaj rekoni bildojn: tial la sepjara kvarpiedulino Betsy el Vieno estas konsiderata la plej saĝa hundo en la mondo. Raso: landlima ŝafhundo.

Betsy surprizis en frua aĝo sian posedantinon per bona parolkompreno. Se tiu nomis objekton, la hundino malaperis kaj post kelka tempo revenis kun ĝi en la buŝo. Se la virino menciis hundorimenon, Betsy poste venis kun ĝi – sammaniere okazis je la balailo, kiun la hundino klare distingas de balaileto.

Karoto

„Ĉio komenciĝis, kiam nia favoratino aĝis kvar aŭ kvin monatojn”, rememoras la posedantino. „Betsy tiam subite ekis alporti aĵojn, pri kiuj ni en la momento parolis. Tutegale ĉu karoto, fromaĝo aŭ kaŭĉuka kolbaso.”

Reprezentantoj de la Guiness-libro de rekordoj kontrolis ŝiajn eksterordinarajn kapablojn, kaj sciencistoj el Max-Plank-instituto en Lepsiko (Germanio) konfirmis la nekredeblan inteligenton de Betsy. Landlimaj ŝafhundoj estas aparte lernemaj kaj kun pudeloj apartenas al la plej saĝaj hundorasoj.

Evgeni GEORGIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Evgeni Georgiev el Monato (www.monato.be).

Lasta adapto de tiu ĉi paĝo: 2020-07-07