En Demokratia Respubliko Kongo ekzistas 11 provincoj. La registaro volas distranĉi la landon por krei entute 26 provincojn aŭ federaciajn ŝtatojn. La senato jam aprobis la proponon.

Dubindas, ĉu la ŝanĝoj helpos la kongan popolon. En vasta lando tia regas aliaj prioritatoj, ekzemple kreado de pli bonaj vivkondiĉoj, kiaj ekzemple elektro, akvo, vojoj. Jam suferas multaj partoj de DRK pro mankoj tiaj, kaj krei novajn provincojn ne helpos.

Eble male. Povas esti, ke profitos tiuj provincoj, kiuj jam disponas pri pli bonaj vivkondiĉoj, dum aliaj restos en mizero. Saĝa virino konstruas sian hejmon, tiel ke ĝi ne estu endanĝerigata. La nunaj proponoj povus konduki al malpaco aŭ eĉ milito. Konsilindas atendi.

Nelly MASEMI/pg

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Nelly Masemi/pg el MONATO (www.monato.be).

Lasta adapto de tiu ĉi paĝo: 2020-07-07