Kandidatis la socialdemokrato Heinz Fischer [hajnc fiŝa], la ĝisnuna prezidanto. Li naskiĝis en 1938 en Graz [grac]. Dum la diktatura periodo de 1938 ĝis 1945, kiam Aŭstrio estis parto de la Germana Regno, liaj gepatroj parolis antaŭ li nur en Esperanto por kaŝi sian opinion.

Valoroj

Fischer mem ne parolas Esperanton kaj ne subtenas la lingvon. Li studis juron, aktivis politike kaj iĝis prezidanto unuafoje en 2004 (52 % de la voĉoj). Nun li kandidatis kiel sendependa persono kaj pledis por „valoroj” sen specife diri pri kiuj. La Verda Partio oficiale subtenis lin.

La dua laŭ aboco estis Rudolf Gehring [gering], la estro de la Kristana Partio. Li subtenis geedziĝon kaj familion kaj kontraŭis samseksemon.

Sekureco

Kiel tria kandidatis Barbara Rosenkranz [rózenkranc] de la Libereca Partio. Ŝi favoris familion, gepatran landon, sekurecon kaj Eŭropan Union. Sur afiŝoj ŝi aperis kiel „forta virino”.

Ofte oni atakis ŝin kiel dekstregan pensanton. Kunlaboranto de la „sendependa” aŭstra televido ORF eĉ donis monon al junaj viroj, por ke tiuj vestu sin kiel nov-nazioj kaj parolu tiuspecajn sloganojn. Dum televid-elsendoj oni falsis ŝiajn citaĵojn.

La rezulto: Fischer 79 %, Rosenkranz 16 %, Gehring 5 %.

Walter KLAG

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Walter Klag el MONATO (www.monato.be).

Lasta adapto de tiu ĉi paĝo: 2020-07-07