MONATO
Por skribi al ni
Serĉi en MONATO

Moderna vivo

OPINIO

Unu ŝtato, du landoj

En februaro front-en-flanke koliziis du trajnoj en Buizingen [béjzinge], Belgio. La terura bilanco estis 18 mortintoj kaj 162 vunditoj, sed la stato de pluraj vunditoj restas kriza. Kvankam daŭras esploroj de la fakuloj, redakcioj ricevis deklarojn de spektantoj, ke unu trajnkondukisto neglektis ruĝan haltigolumon.

La katastrofo sendube kaŭzis multajn emociojn, precipe ĉe fervojistoj. Spontanee, kaj sen subteno de la tradiciaj sindikatoj, estiĝis strikoj. Sed denove montriĝis tiu stranga dividlinio inter la belgoj. En Valonio, la striko estis preskaŭ kompleta, dum en Flandrio strikis fervojistoj nur ĉe la deponejo en Leuven, tie kie ili perdis kolegon pro la akcidento.

La sola klarigo pri kontrastaj reagoj tiaj estas kultura diferenco. Maloftas tiel malgranda teritorio, kie la reagmaniero tiom diferencas. Cent okdek jaroj da kunvivado en unu ŝtato kun amasaj migradoj inter la du landpartoj tute ne sukcesis ebenigi tiujn kontrastojn. Ŝajnas cetere, ke la plimulto de la politikistoj plifortigas la polarizon.

Ivo DURWAEL

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Ivo Durwael el MONATO (www.monato.be).

Lasta adapto de tiu ĉi paĝo: 2020-07-07