MONATO
Por skribi al ni
Serĉi en MONATO

Politiko

OPINIO

Pordo al okcidento

La eŭropa enirejo: tiel taksas ĉinoj Hungarion. Eble troas diri, ke ĉinoj opinias hungarojn la unusola parenca popolo en Eŭropo, sed fakto estas, ke la ordo de hungaraj kaj ĉinaj personaj nomoj identas, ke la distribuo de sango-grupoj de hungaroj kaj nordaj ĉinoj samas kaj ke konstateblas simileco en popolmuziko kaj en popolarto ankaŭ en norda Ĉinio.

Fine de socialismo ĉinoj are alvenis en Hungarion. Ili komence kuiris en ĉinaj restoracioj kaj komercadis. Ĉinaj varoj iĝis popularaj inter malriĉaj hungaroj. Laŭ opinisondadoj, hungaroj taksis ĉinojn la plej bona popolo inter ciganoj, slovakoj, rumanoj kaj aliaj vivantaj en Hungario. En Hungario vivas granda ĉina kolonio. Ankaŭ la Banko de Ĉinio funkcias en Budapeŝto, kio estas unika en la regiono.

Lernejo

Dulingva lernejo estas fondita en Budapeŝto kaj do, spite lingvajn malfacilaĵojn, naskiĝis nova generacio dulingva. Por ĉinoj la hungara lingvo estas tiel malfacila kiel la rumana aŭ la ĉeĥa.

La ĉina registaro alte taksas la hungaran kontakton, ĉar Hungario apartenas al Eŭropa Unio, membras en la t.n. Schengen-grupo (eŭropaj ŝtatoj, inter kiuj ne ekzistas landlimaj kontroloj) kaj verŝajne baldaŭ en la eŭro-zono. Pro tio ĉina kompanio planas konstrui fabrikon en Hungario por munti aŭtobusojn.

Karlo JUHÁSZ
Hungario

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Karlo Juhász el MONATO (www.monato.be).

Lasta adapto de tiu ĉi paĝo: 2020-07-07