Inundiĝis dekmiloj da hektaroj en la nordokcidenta, malalta kamparo de Albanio, inkluzive de domoj, bienoj kaj brutaroj. Kulpis ne la vetero, sed mise administrataj akvocentraloj.

Ĉe la norda rivero Drin, en regiono alpmontara, estas konstruitaj tri grandaj akvocentraloj. Abundas akvo, ekzemple pro la neĝoj. La centraloj, kiuj produktas ĉ. 95 % de la enlanda elektro, ĉiuj posedas siajn basenojn, por teni la akvon, kun suma volumeno de 74 milionoj da kubmetroj.

Tuneloj

Tamen, kiam troas akvo, necesas ĝin revenigi per tuneloj al la rivero. Pro tio, kaj pro neriparitaj digoj, okazis la inundoj.

Helpis la viktimojn kaj la armeo kaj eksterlandaj trupoj, ekzemple de Nord-Atlantika Traktat-Organizaĵo (NATO). Tamen forte kritikis la registaron la opozicio pro neglekto de la afero.

Bardhyl SELIMI/pg

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi/pg el MONATO (www.monato.be).

Lasta adapto de tiu ĉi paĝo: 2020-07-07