MONATO
Por skribi al ni
Serĉi en MONATO

Moderna vivo

GRIPO

Kurac-ajlo

La t.n. porkan gripon ne evitis Litovio. Homoj ĉie malsaniĝis, krom ĉe unu loko – infanvartejo en la ĉefurbo Vilnius. Eĉ ne unu el la 71 infanoj suferis pro la gripo kaj, kiam oni esploris, la mistero tuj klariĝis. Kiam oni malfermis la pordon de la ejo, trafis la nazon forta odoro de ajlo.

La ajlan rimedon elpensis du junaj vartistinoj. Sciante, ke ajlo protektas kontraŭ virusoj, ili decidis provi ĝin kontraŭ la gripo. Tiel sur la kolon de ĉiu infano ili pendigis kestetojn entenantajn freŝan ajlon. Dum ludoj ili fojfoje petis, ke la infanoj enspiru la ajlo-odoron. Post kelkaj tagoj en la kolkestetoj aperis nova freŝa ajlero.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07