MONATO
Por skribi al ni
Serĉi en MONATO

Moderna vivo

FAMILIOJ

Kvinopa sukceso

Rimarkinda estas la sorto de ĝemelo-kvinopo naskiĝinta en Bulgario en malriĉa romaa ortodoks-kristana familio. La ĝemeloj – tri knabinoj, du knaboj, kiuj eniris la mondon en 1987 – ne similas unu al la aliaj, tamen ili same sin vestas.

Dum 21 jaroj ili malofte disiĝis. Inter ili ekzistas nerompebla ligo. Notindas, ke la patrino – lernej-purigistino, kiu monate enspezas ĉirkaŭ 90 eŭrojn – tamen sukcese edukis ilin ne ŝteli aŭ mensogi (malvirtoj laŭdire karakterizaj por malriĉaj romaaj familioj).

Helpis la familion la vic-direktorino de la lernejo, kie laboras la patrino, tiel ke la ĝemeloj finis la mezlernejon kun la intenco plu studi ĉe supera lernejo. La kvinopo perlaboris monon por aĉeti balvestaĵojn por celebri sian mezlernejan sukceson.

Dimitar HAĜIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Dimitar Haĝiev el MONATO (www.monato.be).

Lasta adapto de tiu ĉi paĝo: 2019-04-17