MONATO
Por skribi al ni
Serĉi en MONATO

Politiko

KOSOVO

Sendependeco ne akceptebla

La 15an de februaro, post definitiva raporto de elekto-komisiono, fariĝis por la venontaj kvin jaroj la nuna ŝtatestro Boris Tadić nova prezidanto de la respubliko Serbio.

La tago gravas en la historio de Serbio. La 15a de februaro estas la Tago de la Ŝtato Serbio kaj la Tago de la Armeo de Serbio. Ĉi tiun tagon en 1804 ekribelis serboj kontraŭ turkaj okupantoj. La saman tagon en 1835 estis akceptita la unua serba konstitucio. Ĉi-jare la sama tago koincidas ne nur kun la prezidantiĝo de Tadić, sed ankaŭ preskaŭ kun la sendependiĝo de Kosovo disde Serbio.

La novelektita prezidanto en la festparolado diris, ke nek li, nek Serbio akceptos Kosovon kiel novan ŝtaton sur serba teritorio. Tiel li frontos al diversaj problemoj, ne nur Kosovo, sed ankaŭ membreco en Eŭropa Unio, senlaboreco kaj krimeco.

Tadić venkis en la dua balota rondo per nur 2 % la kontraŭkandidaton el la Radikala Partio, Tomislav Nikolić.

Dimitrije JANIČIĆ

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Dimitrije Janičić el Monato (www.monato.be).
Lasta adapto de tiu ĉi paĝo: 2019-04-17