MONATO
Por skribi al ni
Serĉi en MONATO

Politiko

MAKEDONIO

Konfuzo postbalota

Venkis en balotoj en Makedonio la makedon-etna dekstro, gvidata de Nikola Gruevski, kaj la alban-etna maldekstro, gvidata de Ali Ahmeti. Sed Gruevski, la nova ĉefministro, elektis por sia koalicia registaro ne la partion de Ahmeti, sed tiun de Arber Xhaferi [dĵaferi], kiu estas same alban-etna, sed dekstra, kaj natura partnero en dekstrema registaro.

Influis la decidon tio, ke la partio de Ahmeti estas kreita de eksaj ribeluloj. En 2001 la Naciliberiga Armeo renversis la dekstran partion makedon-etnan kaj tiel ebligis, per la Interkonsento de Ohrid, pli da rajtoj por albanoj.

Humiligite, Ahmeti instigis dekmilojn da albanoj plenigi la placojn kaj manifestacii kontraŭ la registaro. Tiel evidentas, ke albanoj en Makedonio ne sukcesis fondi propran etnan koalicion por garantii al si pli da etnaj rajtoj. Kaj ankoraŭ ne tute plenumiĝis la Interkonsento de Ohrid, pri kiu la nova ĉefministro ŝajne indiferentas.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el MONATO (www.monato.be).

Lasta adapto de tiu ĉi paĝo: 2019-04-17