MONATO
Por skribi al ni
Serĉi en MONATO

Medio

SVEDIO

Alternativa Nobel-premio

La ĉi-jara „Premio pri ĝusta vivmaniero” (angle: Right Livelihood Award) iras al kvar ricevontoj:

1. La defendanto de homaj rajtoj Aminatou Haidar en Okcidenta Saharo, „pro ŝia konstanta senperforta agado, malgraŭ malliberiĝo kaj torturo, cele al justeco kaj memdecidrajto por la popolo de Okcidenta Saharo”.

2. La advokato Guo Jianmei en Ĉinio, „pro ŝia pionira kaj persista laborado por sekurigi la rajtojn de virinoj en Ĉinio”.

3. La klimataktivulino Greta Thunberg en Svedio, „ĉar inspiranta kaj pliklariganta politikajn postulojn pri urĝa klimatagado, kiu reflektas sciencajn faktojn”.

4. La indiĝena gvidanto Davi Kopenawa de la janomana popolo en Brazilo, kune kun Hutukara Associação Yanomami, „pro ilia kuraĝa rezoluteco por protekti la arbarojn kaj biodiversecon de la amazona regiono, kaj la landojn kaj kulturon de ĝiaj indiĝenaj popoloj”.

La premio estis fondita en 1979, kiam la sved-germana filatelisto Jakob von Uexküll [fon ikskil] proponis al la Nobel-fondaĵo krei du novajn Nobel-premiojn, ne komprenante, ke la testamento de Nobel ne ebligas tion. Eĉ la sveda nacia banko ja povis krei nur Nobel-memorpremion pri ekonomiko, ne Nobel-premion. Pro la rifuzo de la fondaĵo, von Uexküll do fondis propran premion, financatan de lia poŝtmarkkolekto.

Gunnar GÄLLMO
korespondanto de MONATO en Svedio

Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 12, p. 16.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Gunnar Gällmo el MONATO (www.monato.be).

Lasta adapto de tiu ĉi paĝo: 2020-07-07