MONATO
Por skribi al ni
Serĉi en MONATO

Moderna vivo

ARKITEKTURO

Pendanta plafono, pendanta tolo

La urbodomo de Aŭgsburgo estas valoraĵo: bela kaj unueca renesanca konstruaĵo el la 17a jarcento, unu el la plej eminentaj profanaj konstruaĵoj norde de la Alpoj.

La „urba konstrumajstro” (germane: Stadtbaumeister [ŝtatbaŭmajstr]) Elias Holl devenis el familio de arkitektoj. Dum la periodo 1600-1601 li vojaĝis al Venecio kaj tie perfektigis siajn konojn kaj lerton.

Notinda ĉe la urbodomo estas la „ora salono” en la dua etaĝo, granda halo sen kolonoj. La „truko” de Holl: li pendigis la plafonon per ĉenoj de la tegmenta trabaro.

Donacoj

Dum la dua mondomilito trafis la konstruaĵon bomboj. La ora salono estis brule detruita. En 1985, kiam Aŭgsburgo festis sian 2000-jaran jubileon, oni renovigis la urbodomon kaj, per civitanaj donacoj, komencis rekonstrui la oran salonon.

Nun, 30 jarojn poste, necesas nova farbo. Tiucele oni konstruigis skafaldon. Tiu fuŝis la aspekton kaj la fotojn de turistoj. Sed venis surprizo.

Post pendigo de ŝirma tolo kun surpresita foto en originala grandeco, la urbodomo aspektas preskaŭ kiel ĉiam, nur pli pura kaj blanka. Oni preskaŭ ne vidas la skafaldon kaj la unuopajn tolbanderolojn.

Jomo IPFELKOFER
korespondanto de MONATO en Germanio

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Jomo Ipfelkofer el Monato (www.monato.be).
Lasta adapto de tiu ĉi paĝo: 2019-04-17