MONATO
Por skribi al ni
Serĉi en MONATO

Scienco

KUBO

Kiam konferenco malkonferencas

De la 25a ĝis la 27a de aprilo 2016 en la Universitata Kolegio San Jerónimo („Sankta Hieronimo”) de Havano (Kubo) okazis informadika „malkonferenco”, kies titolo estis Cubaconf 2016. La kuriozan aranĝon sponsoris la fondaĵo Python („Pitono”) kune kun la kuba trinkaĵa entrepreno Ciego Montero kaj la tiel nomata Oficejo de la ĉefurba historiisto. Krom lokaj volontuloj el la neoficiala – sed vere agema – GUTL („Grupo de uzantoj de teknologioj liberaj”), pluraj eksterlandaj entuziasmuloj helpis kunordigi la tuton.

Neologismo

La neologismo uzata en ĉi tiu artikolo (angle unconference) aludas al specifa eco de tiaj renkontiĝoj por informadikistoj: ili estas tute neformalaj, estas karakterizataj de sufiĉe senstruktura programo (la pritraktendajn temojn oni elektas per publika, afiŝa voĉdonado) kaj per oftaj koridoraj konversacioj kaj kontaktoj inter fakuloj. En tiu neformala etoso, anstataŭ per la kutimaj kongresaj nomŝildoj la partoprenantoj estas identigeblaj per simpla paperrubando surbruste algluita: tie aperas nur onia persona nomo.

Usono

La defio okazigi unuafoje ĉi tian aranĝon en Kubo, kie kutime kongresoj havas rigore fiksitan programon, sukcesis allogi kaj kunvenigi ĉirkaŭ 200 homojn, inkluzive – spite al kelkaj kliŝoj pri informadiko – plurajn virinojn, el 17 landoj, inter kiuj Usono. La laborlingvoj estis kaj la hispana kaj la angla.

Alberto GARCÍA FUMERO
korespondanto de MONATO en Kubo

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Alberto García Fumero el Monato (www.monato.be).
Lasta adapto de tiu ĉi paĝo: 2019-04-17