MONATO
Por skribi al ni
Serĉi en MONATO

Moderna vivo

SPORTO

Fluge en la rekordojn

Sendube la ĉefa sporto en Slovenio estas skiado. La lando estas du-trione alpa-montara kaj preskaŭ ĉiuj sanaj gejunuloj scias skii.

Dum deko da jaroj slovenaj skiistoj havis bonajn rezultojn en klasikaj specoj de la Monda Pokalo de Alpa Skiado (slalomo, grandslalomo ktp). La pinton atingis la skiistino Tina Maze. En 2014 ŝi iĝis monda ĉampiono sume en ĉiuj fakoj de la Monda Pokalo de Alpa Skiado, kun rekorda nombro de poentoj neniam antaŭe atingita.

Saltoj

Ĉi-jare sin prezentis nova nomo en alia skivetkuro – skiaj flugoj, fako de pli ol 200-metraj saltoj. Fine de la sezono, en marto, Peter Prevc iĝis monda ĉampiono, kaj, kiel Tina Maze, atingis absolutan rekordon kun entute 2303 poentoj, pli ol iu ajn antaŭ li.

La 23-jaraĝulo, kiu naskiĝis kaj vivas en vilaĝo en norda Slovenio, akrigis aliajn rekordojn. Li flugis 250 metrojn kaj venkis en sia ununura sezono 15 fojojn. Li atingis la unuan lokon ankaŭ en la t.n. novjara Turneo de Kvar Skiflugejoj, kiu okazas en Germanio kaj Aŭstrio. Supozeble nun atendas lin riĉa kariero.

Prevc devenas de familio kun du fratoj kaj du fratinoj. Ankaŭ ambaŭ fratoj skiflugas. La 17-jaraĝa Domen jam apartenas al la monda elito, ĉar ĉi-sezone li rangiĝis 14a en la mondo.

Zlatko TIŠLJAR
korespondanto de MONATO en Kroatio

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Zlatko Tišljar el Monato (www.monato.be).
Lasta adapto de tiu ĉi paĝo: 2019-04-17