MONATO
Por skribi al ni
Serĉi en MONATO

Moderna vivo

BICIKLADO

Pedale normale!

En la aŭstra ĉefurbo Vieno biciklado iĝas pli kaj pli populara. Temis unue pri ĉefe hobia afero, tamen lastatempe la biciklo fariĝis jam ofte veturilo por ĉiutaga uzo.

En 1990 biciklaj koridoroj sumis en Vieno 190 km, aktuale jam 1298 km. Krome ekzistas 39 000 lokoj por starigi biciklojn. La biciklan vojon antaŭ la ŝtata operejo uzis labortage en februaro 2016 averaĝe 2300 biciklantoj. Tio estas draste pli ol pasintjare, sed la ĉefa kialo por la kresko estis la varma, senneĝa kaj senpluva vetero.

Apartigitaj

Vojmontriloj sur la stratoj kaj specialaj urbaj mapoj gvidas biciklantojn, kiuj nur malofte devas miksi sin en la danĝeran aŭtotrafikon. La biciklejoj estas preskaŭ ĉie apartigitaj disde la poraŭtaj, porbusaj kaj portramaj koridoroj.

Ŝteli biciklon estas preskaŭ la perfekta krimo. Nur 5 % de la ŝtelitaj bicikloj revenas al la posedantoj. La predo reaperas en pulbazaro aŭ estas eksportata en orient-eŭropajn landojn. En Vieno ekzistas miliono da bicikloj, el kiuj estas ŝtelitaj ĉiujare preskaŭ 10 000.

Walter KLAG
korespondanto de MONATO en Aŭstrio

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Walter Klag el Monato (www.monato.be).
Lasta adapto de tiu ĉi paĝo: 2019-04-17