MONATO
Por skribi al ni
Serĉi en MONATO

Politiko

BALKANIO

Libere moviĝi

Antaŭ nelonge la Eŭropa Parlamento voĉdonis favore al libera moviĝo en EU ankaŭ por civitanoj de Albanio kaj Bosnio. La evento eĥiĝis entuziasme ĉe la albanoj, probable la plej izolita popolo en Eŭropo almenaŭ post la dua mondmilito.

Kulpis unue la komunisma tiel nomata fera kurteno kaj poste tiu de Eŭropo mem, kiu malhelpis al albanoj moviĝi tra kontinento, al kiu ili apartenas ekde pratempo.

Post 1990 ĉirkaŭ 30 % de la albana loĝantaro (1,5 milionoj da homoj) elmigris plejparte senvize. Nun familianoj, restantaj en Albanio, senpacience esperas ilin revidi. Kelkaj albanoj tamen opinias, ke libera moviĝo kondukos al amasa forfuĝo de albanoj. Verŝajne tio ne okazos.

Aŭtobusoj

En aliaj balkanaj landoj, pro la rajto libere moviĝi, multaj veturis okcidenten. Ekzemple antaŭ unu jaro en Sofio, Bulgario, staris dekoj da aŭtobusoj en la urbocentro pretaj ekveturi al okcidentaj eŭropaj landoj. Nun ne plu: mankas mono por vojaĝi.

Restas ankoraŭ unu lando en Balkanio, kies civitanoj ne rajtas libere moviĝi: Kosovo. Iam ankaŭ kosovanoj veturis senĝene tra la iama Jugoslavio. Pro tio multaj gejunuloj petas serban pasporton ĉe oficejoj tiucele malfermitaj en serbaj komunumoj.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2020-07-07