MONATO
Por skribi al ni
Serĉi en MONATO

Leteroj

Kumamoto ne jubileu

En sia interesa artikolo pri Kumamoto (MONATO 2010/8-9, p. 20-21) sinjoro Harada skribas, ke la kastelo de Kumamoto festis la 400-jaran jubileon de sia ekzisto. Certe la kastelkonstruo finiĝis en 1610, kaj ni estas en 2010.

Tamen estas dirinde, ke la nuna kastelo ne estas tiu, kiu estis konstruita en la 17a jarcento. La originala kastelo estis plejparte detruita en 1877 dum la enlanda milito konata kiel la ribelo de Satsuma. La nuna kastelo, kaj precipe ĝia ĉefturo, estis rekonstruita en 1960. Mankas do 83 jaroj por 400-jara ekzisto.

Multaj japanaj kasteloj malaperis, ĉu pro tertremoj, ĉu pro incendioj, ĉu pro militoj, inter kiuj estas la dua mondmilito, kiu sola detruis kvin el ili. Restas nur 12 originalaj kasteloj, kaj Kumamoto ne estas inter ili, la plej malnova estas tiu de Maruoka (1576) en la gubernio Fukui.

Thierry TAILHADES
Francio

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Thierry Tailhades el Monato (www.monato.be).

Lasta adapto de tiu ĉi paĝo: 2020-07-07