MONATO
Por skribi al ni
Serĉi en MONATO

Moderna vivo

UKRAINIO

Servo malsana

Laŭ la konstitucio de Ukrainio, ĉiu civitano rajtas ricevi senpagan medicinan helpon en tiel nomataj poliklinikoj aŭ hospitaloj. Tamen evidentiĝas, ke tiu „senpaga” helpo tre multe kostas, ekzemple se okazas operacio.

Nun, pro ukazo de la ministro pri edukado, ĉiu instruisto, ĉu en baza, ĉu en supera lernejo, ĉiujare submetiĝu al kontrolado de sia sanstato. De iu vidpunkto tio pozitivas. De alia, tamen, tio kondukos nur al riĉigo de kuracistoj.

Libervole

Viziti kuraciston kostas tempon (pro longaj vicoj) kaj monon. Cetere, antaŭ ol akcepti novan pacienton, kuracisto devas kontroli, ĉu tiu pagos „libervole” al bonfara fonduso de la koncerna polikliniko.

Ekzistas alia, kontraŭleĝa, vojo. Konato de la kuracisto akceptas monsumon kune kun la sanlibreto de la instruisto. Post iom da tempo revenas la libreto kun laŭe stampitaj paĝoj, kvazaŭ la paciento estus kuraciste kontrolita. Tiel solviĝas la problemo – korupte.

Dmitrij CIBULEVSKIJ

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Dmitrij Cibulevskij el Monato (www.monato.be).

Lasta adapto de tiu ĉi paĝo: 2020-07-07