MONATO
Por skribi al ni
Serĉi en MONATO

Moderna vivo

ALBANIO

Decido ekzamenata

Magistriĝontoj ĉe albanaj universitatoj devos trapasi ekzamenon pri la angla lingvo, decidis lastatempe la albana registaro. La angla, laŭ la albana ĉefministro Sali Berisha – cetere honora prezidanto de albanaj anglemuloj –, ludas „ĉiam pli gravan rolon en internaciaj aferoj”.

Forte kontraŭis la decidon universitataj instruistoj kaj aliaj. La decidon ili taksis absurda, atentigante, ke pli ol 95 % de la magistriĝontoj sin okupas per albanlingvaj kaj enlandaj aferoj. Cetere ili ofte jam scipovas fremdajn lingvojn, investinte tempon kaj monon. Unu el la kritikantoj eĉ aldonis, ke la ĉefministro mem trapasu la ekzamenon, ĉar tiu ne flue parolas la anglan.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2020-07-07