MONATO
Por skribi al ni
Serĉi en MONATO

Moderna vivo

AMIKECO

Programoj - ne prelegoj

Pro kunlaboro inter redakcianoj de la albana televido-programo „Perditaj homoj” kaj de la rusa „Ĵdi menja” („Atendu min”), revidas sin familianoj kaj iamaj amikoj.

Ruso, Gavrila Bakiŝev, el la urbo Gori (Kartvelio), servis ĉe la rusa blanka gvardio kaj post 1924 ĉe la reĝa gvardio en Albanio. Lia nepino Alla Mihajlovna en Moskvo serĉis la avon pere de la Ruĝa Kruco kaj laste per la televida programo. Samon faris lia albana filo Jovan, ĉirkaŭ 72-jara, en Tirano. Fine, la nepo albana Kliti, filo de Jovan, studanta en Rusio, sin prezentis antaŭ Ala, feliĉigante ankaŭ spektantojn en ambaŭ landoj.

Amikino

Simile, rusino Saida Romanova el Harkovo (Ukrainio), konatiĝis antaŭ 1960 kun albana studento Muhamet Stafa. Post la malamikiĝo inter la du landoj, ŝi ne plu vidis lin. Muhamet, nun 68-jara, sukcesis, danke al ambaŭ redakcioj, vojaĝi al Moskvo kaj renkonti sian iaman amikinon.

Argumenteble elsendoj tiaj fortigas amikajn sentojn inter popoloj pli ol prelegoj politikaj.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2020-07-07