MONATO
Por skribi al ni
Serĉi en MONATO

Politiko

POLLANDO

Elektoj pli fruaj

Post la morto de la pola prezidanto Lech Kaczyński en aviadila katastrofo, en kiu pereis entute 96 homoj, inkluzive de politikaj kaj kulturaj altranguloj, sekvos monatoj da necerteco.

La prezidantan rolon transprenis la ĉefmarŝalo de la parlamento, Bronisław Komorowski, jam prezidant-kandidato de sia partio PO (Civitana Platformo) en balotoj origine okazigotaj en oktobro. Tamen pro la politika situacio la balotoj okazos pli frue.

Ĝemela frato

Ne eblas diri, kiu venkos. Krom Komorowski prezentos sin kandidato de la dekstra partio PIS (Juro kaj Justeco), al kiu apartenis Lech Kaczyński. Nepras nun, ke PIS rapide trovu novan kandidaton. Verŝajne tiu estos la ĝemela frato de la pereinta prezidanto. Iama ministro de justico, Zbigniew Ziobro, ege konservativa, malpli verŝajnas kiel kandidato.

La maldekstra flanko ne havas multajn ŝancojn. Ĝi malpli popularas kaj ĝia ĉefkandidato ĵus pereis. Aktuale la plej populara kandidato estas Komorowski, sed potenca restas PIS. Ĝi parolas pri la devo esti „patriota”, kvazaŭ nur dekstremuloj estus tiaj. Cetere ĝi volas „plenumi la vojon kaj celojn” de la ĵus mortinta prezidanto.

Anna SKUDLARSKA

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Anna Skudlarska el Monato (www.monato.be).
Lasta adapto de tiu ĉi paĝo: 2019-04-17