MONATO
Por skribi al ni
Serĉi en MONATO

Politiko

ALBANIO

Protesto kaj progreso

Protestis la albana ministro pri eksteraj aferoj Ilir Meta pro la insulta konduto de grekaj soldatoj kontraŭ albanoj.

La soldatoj, partoprenantaj paradon en Ateno okaze de la greka tago de sendependeco, kriis, ke albanojn ili murdos kaj el ilia haŭto kudros siajn vestojn. Plue, spite al leĝo pri la egalaj rajtoj de enmigrintoj akiri grekan ŝtatanecon kaj la deklaro de la greka ĉefministro Papandreu, ke „greko estiĝas ne nur denaske, sed ankaŭ poste”, la soldatoj kriis, ke „greko naskiĝis, ne estiĝos”.

Suspendo

Pro la insulto pardonpetis la greka registaro. La ministro pri defendo suspendis la oficiron, kiu respondecis pri la koncernaj soldatoj.

Malgraŭ tiu ĉi incidento, interrilatoj politikaj kaj ekonomiaj inter Albanio kaj Grekio bone progresas. La estonteco de pli ol 800 000 albanaj rifuĝintoj en Grekio iĝas pli esperiga. Koincide, je la sama tago de la parado la albana parlamento aprobis du pliajn tombejojn por grekaj soldatoj falintaj en Albanio dum la milito itala-greka en 1940.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2020-07-07