MONATO
Por skribi al ni
Serĉi en MONATO

Moderna vivo

AŬSTRIO

Pele surrele

En la viena amuzkvartalo Prater okazis en marto la dua drezina vetkurado. Drezino estas malpeza surrela veturilo, ĝenerale kvarrada, uzata por transporti relojn kaj aliajn fervojajn materialojn. Ĝin kreis la germana nobelo Karl Drais [drajs] (1785-1851), kiu inventis ankaŭ pianoludan registrilon kaj skribomaŝinon.

Por la tago de la vetkurado oni prognozis mildan printempan tagon, sed fakte kuŝis iom da neĝo sur la herbejoj. La evento evoluis sur la reloj de etŝpura fervojo Liliputbahn. Ĉiu inter 8 kaj 99 jaroj rajtis partopreni kaj, paginte 30 eŭrojn, uzi je propra risko memkonstruitan drezinon.

Skoltoj

La unuan premion ricevis skolta grupo el Vieno, kiu gajnis jam ĉe la unua vetkurado. La skoltoj bezonis nur 87 sekundojn por la 1500-metra distanco. Gravis por venki ne nur rapido, sed ankaŭ prezentado, aktorado dum la veturo kaj konstruarto de la veturilo.

En la epoko de Drais drezino estis speco de prabiciklo, kiu dependas de homopovo. Nuntempe, ankoraŭ malpezaj, ili iufoje uzas motorojn. Ili servas turismon kaj tiel helpas savi etŝpurajn fervojojn.

Walter KLAG

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Walter Klag el Monato (www.monato.be).

Lasta adapto de tiu ĉi paĝo: 2020-07-07