MONATO
Por skribi al ni
Serĉi en MONATO

Politiko

ELMIGRADO

Vizo-krizo

Tuj post la liberaligo de vizoj por civitanoj de Serbio, Makedonio kaj Montenegro, konstateblis eliro el tiuj landoj al okcidenta Eŭropo. Tio rimarkeblas aparte en la plej malriĉaj sociaj tavoloj kaj regionoj, ekzemple en okcidenta Makedonio kaj suda Serbio, kie loĝas albanoj.

Post la 19a de decembro 2009 nur el Kumanovo en Makedonio elmigris al Belgio ĉirkaŭ 3400 albanaj junuloj kaj viroj. Ili serĉis tie postenojn kaj azilon. El la regiono de Preŝevo, suda Serbio, elmigris jam ĉirkaŭ 20 000 homoj.

Laŭ albanaj politikistoj, fenomeno tia ekonomie kaj demografie malutilas al la koncernaj regionoj. Krome povas esti, ke estos prokrastita la akcepto en la Ŝengen-zonon de Albanio, Kosovo, Bosnio kaj Hercegovino, kiuj ankoraŭ ne akiris rajton pri libera moviĝo tra EU-landoj.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2020-07-07