MONATO
Por skribi al ni
Serĉi en MONATO

Moderna vivo

USONO

Narkotaj Dakotoj

En 1980 la usona registaro donacis monon kaj teron en Norda kaj Suda Dakoto al indianaj triboj, kiuj centon da jaroj antaŭe perdis sian tradician terenon. Fakte la nomo de la du ŝtatoj, Dakoto, devenas de la siua „dakóta”, kiu signifas „aliancano”.

Tamen malgraŭ la helpo de la registaro la triboj restas en ekstrema malriĉeco. Senlaboreco atingis 80 % de la tribanoj, kiuj provis kultivi la teron, sed la grundo en la rezervejoj ne tiom facile prilaboreblas kiom en la regionoj okupitaj de blankuloj.

Do en la pasintaj dek jaroj la restantaj siuoj defiis la registaron kaj komencis kultivi kanabon por industria uzo, ekz. ĉe papero- aŭ parfumo-fabrikoj. Tamen evidentiĝis, ke la kanabo estis uzata ankaŭ por krei narkotaĵojn.

Konstitucio

Rezulte, la instancoj eniris la hejmojn de siuoj kaj arestis tribanojn. Sed la usona konstitucio malpermesas, ke la instancoj eniru privatajn hejmojn sen kortuma arest-mandato.

La siuoj plendis ĉe distrikta federala kortumo, sed vane. Pro tio ili daŭre kultivas kanabon, argumentante, ke ilia industria kanabo, ĉerpita de folioj, ne enhavas la pli toksajn ĥemiaĵojn troveblajn ĉe kanabo deprenita de la tigo de la planto.

La kortumo tamen rekomendis, ke la siuoj provu ĉe la usona parlamento, aŭ kongreso. Intertempe, ĝis decidos la kongreso, ŝajnas, ke eliri el malriĉeco ne facilas al la restantaj siuoj.

Elson B. SNOW

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Elson B. Snow el Monato (www.monato.be).

Lasta adapto de tiu ĉi paĝo: 2020-07-07