MONATO
Por skribi al ni
Serĉi en MONATO

Moderna vivo

VAKCINADO

Protektas nur Dio

Fine de oktobro estas vakcinitaj kontraŭ poliomjelito la unuaj infanoj en Burundo. Sekvas kampanjo por vakcini ĉiujn infanojn post la malkovro de poliomjelito en la nord-orienta burunda provinco Cibitoke. La provinco apudas la Demokratian Respublikon Kongo, kie jam estas registrita la malsano, kaj Ruandon.

Pli ol miliono kaj duono da burundaj infanoj ricevis la vakcinon, kiel ankaŭ infanoj en la provinco Sud-Kivuo (Kongo). Tamen en Burundo la vakcinoj ne sufiĉis. La instancoj uzis malnovajn statistikojn, kiuj enkalkulis nek la kreskon de la popolo nek la ĉeeston de hejmenvenintaj rifuĝintoj el Tanzanio.

Okazis dua vakcinado-programo en novembro, kiam la instancoj estis pli bone preparitaj. Tamen multaj gepatroj ne revenigis siajn idojn al la vakcinejoj. Cirkulis onidiroj, ke infanoj vakcinitaj spertas problemojn pri siaj intestoj. Tio ja okazis en unu vilaĝo en la provinco Makamba.

Pekado

Alia problemo fontas el preĝejoj, kiuj instruas, ke nur Dio protektas kontraŭ malsanoj, kaj do ke homaj rimedoj ne helpas. Pastroj eĉ aldonas, ke pekas tiuj, kiuj siajn infanojn vakcinigas. Kaj, malgraŭ la klopodoj de la registaro, multaj gepatroj en vilaĝoj ankoraŭ ne komprenas la gravecon de vakcinado.

Poliomjelito disvastiĝas per konsumado de manĝaĵo kaj akvo infektitaj. Ĝi estas forte infekta kaj facile difektas la imun-sistemon de tiuj, kiuj ne estis vakcinitaj. La malsano endemias en kvar landoj de la mondo: Niĝerio, Barato, Afganio kaj Pakistano.

Jérémie SABIYUMVA

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Jérémie Sabiyumva el Monato (www.monato.be).

Lasta adapto de tiu ĉi paĝo: 2020-07-07