MONATO
Por skribi al ni
Serĉi en MONATO

Ekonomio

LITOVIO

Mono el aero

La titolo „Ĉefurbo de Eŭropa Kulturo”, pasintjare atribuita al la litova ĉefurbo Vilnius, havigas novajn ideojn al lertaj komercistoj.

Entreprenisto Eduardas Gromyka, fotisto Paulius Kalmantas kaj dizajnisto Ieva Naujokaitė decidis riĉiĝi per aero kaj komencis negoci per buntaj ladskatoloj plenaj je aero de Vilnius, Kaunas, Klaipėda, Šiauliai kaj Panevėžys.

La skatolo „Aero de Vilnius” indikas, ke enestas 32 % da aero el la antikva urboparto, 27 % el la nova urbo, 22 % el la kvartalo Žvėrynas kaj 19 % el la kvartalo Antakalnis. Tamen ne ĉiu kuraĝas malfermi la misteran skatolon kaj testi la aeron; ĝi ja kostas iom pli ol 7 eŭrojn. La iniciatintoj tiel klarigas la altan prezon: „Aero de Vilnius, samkiel de alia parto de Litovio, ne povas kosti malpli, ĉar ĝi estas multe pli pura ol tiu en aliaj grandurboj de Eŭropo”. La enskatoligita aero estas aĉetata precipe de elmigrintoj kiel donaco por proksimuloj, por kiuj litova aero provokas sentimentojn kompareblajn al nigra sekala pano aŭ iometo da litova grundo. Kial do ne aĉeti eĉ kelkajn pecojn? Tia donaco ne pezas multe kaj ĝia konsuma limdato estas post 100 jaroj!

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el Monato (www.monato.be).

Lasta adapto de tiu ĉi paĝo: 2020-07-07