La aŭstra parlamento akceptis severan leĝon kontraŭ fumado en restoracioj. La leĝo postulas limigitajn zonojn por fumantoj. Nur en establoj kun areo ĝis maksimume 50 m² la estro libere povas decidi, ĉu li permesas fumadon.

En restoracioj kun areo inter 50 kaj 80 m² la kompetenta aŭtoritato devas prijuĝi, ĉu divido de la ejo je fumanta kaj nefumanta zonoj eblas konforme al la protekto de monumentoj. Ĉe pli grandaj restoracioj estas devige disponigi preskribitan zonon por fumantoj, se la restoraciestro entute permesas la nikotinĝuon. Ejoj, en kiuj oni rajtas fumi, devas havi sur bone videbla loko averton: „Fumado minacas vian sanon kaj sanon de viaj kunuloj.”

Labor-kontraktoj

Krome la leĝo kontraŭ fumado enhavas apartajn paragrafojn por protekti en restoracioj laboristojn, aparte junulojn kaj patriniĝontojn. Tiuj ne devas labori en ejoj, en kiuj ili enspiras tabakfumon. Krome, oni devas fiksi en labor-kontraktoj, ke tiu rajtas ricevi kompenson, kiu rompas sian dungorilaton pro pasiva fumado.

Restoraciestroj, kiuj ne alkonformiĝas al la leĝo, riskas monpunojn ĝis 2000 eŭroj kaj, okaze de recidivo, 10 000 eŭroj. Kontraŭagantaj gastoj povas ricevi monpunojn inter 100 kaj 1000 eŭroj. La leĝo kontraŭ fumado ekvalidos la 1an de januaro 2009, kaj transira periodo por rekonstrui restoraciojn daŭros ĝis la mezo de 2010.

Evgeni GEORGIEV

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Evgeni Georgiev el MONATO (www.monato.be).

Lasta adapto de tiu ĉi paĝo: 2019-04-17