MONATO
Por skribi al ni
Serĉi en MONATO

Moderna vivo

AVIADILA SEKURECO

Pordo al danĝero

Aviadilon survoje inter Albanio kaj Turkio kaptis en oktobro nearmita turko. Li devigis la piloton flugi al Italio, celante Romon kaj dirante, ke li havas mesaĝon por la papo. Tamen la aviadilo alteriĝis en Brindisi, en suda Italio, kie la aerpirato cedis al la polico, petante azilon. Neniu el la 113 ostaĝoj en la aviadilo vundiĝis.

La turko, dizertinto el la turka armeo, loĝis plurajn monatojn en Tirano, Albanio, kaj tie petis azilon, kiu estas rifuzita. Li decidis reveni Turkion sed en la aviadilo, trovinte la pordon al la pilotejo malfermita, li minacis la pilotojn kaj postulis, ke ili direktu la flugon al Romo.

Instancoj kaj en Italio kaj en Albanio ekzamenas flughavenan sekurecon. Sed ŝajne ĉiuj antaŭflugaj kontroloj en Tirano estis neriproĉeblaj: la turko ne portis armilon, kiel klare montras flughavena sekureco-filmo. Tamen eraris stevardino, kiu ne fermis la pilotejan pordon.

Bardhyl SELIMI

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Bardhyl Selimi el Monato (www.monato.be).

Lasta adapto de tiu ĉi paĝo: 2019-04-17