Libroj

Kosmoj da aventuroj

En la lastaj jaroj Esperanto-Asocio de Britio eldonis plurajn porinfanajn librojn tradukitajn al Esperanto, inkluzive de Lunkato kaj mi, Ekster la kuniklejo, La fajrovulpo kaj La cent-etaĝa kosmoŝipo. Ĉi tiuj libroj celas la aĝogrupojn de 4–6 jaroj, kaj ili rimarkinde reflektas la profundan zorgon, kiun la eldonisto havas pri la enhavo kaj kvalito de porinfanaj materialoj.

Kiam mi aĉetas porinfanan libron, tiam la temoj ludas esencan rolon, kaj Esperanto-Asocio de Britio tre bone elektis, kiujn verkojn traduki. Ĉiuj libroj prezentas belajn rakontojn kun kuraĝigaj, sed ne tro emfaze ekscitaj, mesaĝoj. La temoj ofte aludas al kuraĝo, amikeco kaj aventuroj, temoj, kiuj forte resonas ĉe infanoj kaj helpas ilin disvolvi pozitivajn sintenojn kaj komprenon pri la mondo ĉirkaŭ ili. Pli detale: La cent-etaĝa kosmoŝipo rakontas la nekutiman kosman vojaĝon de Elsa kaj ŝia hundo allogante ne nur infanojn, sed ankaŭ gepatrojn, kiuj certe aprezos la ironion de la rakonto. En Ekster la kuniklejo ni sekvas la aventurojn de malgranda kuniklo, kiu malkovras, ke ne-kunikloj kaj ne-karotoj povas esti mirindaj, subtenite de la trafaj vortoj de la subtitolo: Unu kunikleto, unu mondego por esplori. Lunkato kaj mi kaj La fajrovulpo enkondukas talismanan beston, kiu ludas gravan rolon en la vivo de la infano; en la unua libro la besto gvidas la infanon tra la defioj de translokiĝo kaj komenco en nova lernejo, dum en la dua ĝi helpas la infanon trakti la malaperon de patro.

La aranĝo de la teksto kaj la ilustraĵoj en tiuj ĉi libroj estas laŭdindaj. La grandeco de la tiparo kaj la spaca aranĝo inter la teksto kaj bildoj estas bone ekvilibrigitaj, ebligante al infano facile sekvi la historion. Por kompari mi mencius alian libron, La eta muso en Bretonio, eldonitan de Édition Rosebois, kiu estas tre bona enhave, sed suferas pro malpli lerta aranĝo. Ekzemple en kelkaj paĝoj la bildoj interrompas la liniojn de la teksto, kio malhelpas la fluon de la legado. La legado de Lunkato kaj mi, Ekster la kuniklejo, La fajrovulpo kaj La cent-etaĝa kosmoŝipo fluas male senprobleme.

Inter la libroj, La cent-etaĝa kosmoŝipo havas tre unikan trajton: grandan elfaldeblan paĝon. Tiu paĝo etendiĝas al kvar paĝoj kaj ebligas al infanoj partopreni interagan aktivadon. Unu el la proponataj ludoj estas nomi objekton de la paĝo kaj peti la infanon trovi ĝin, kio estas bonega maniero stimuli observokapablon kaj imagopovon.

Profesia kvalito

Unu el la plej elstaraj aspektoj de ĉi tiuj libroj estas la profesia kvalito. Ne nur la ilustraĵoj estas altkvalitaj – buntaj kaj allogaj, – sed ankaŭ la tuta prezentado de la libroj estas zorgeme farita. Krome, ĉi tiuj verkoj laŭpreze konkuras kun similaj porinfanaj libroj vendataj en nacilingvaj merkatoj, ekzemple en Italio, sen kompromisoj pri kvalito. Mi povas kompari kun la libro La cosa più importante (La plej grava afero, 14,15 eŭroj), kiu estas la plej ŝatata itallingva libro de mia filo kaj havas kovrilon same dikan kiel Ekster la kuniklejo, La fajrovulpo kaj La cent-etaĝa kosmoŝipo.

En la pasintaj tagoj mi ricevis libron de alia eldonisto enhavantan QR-kodon, per kiu laca patro povas pertelefone laŭtparoligi version de la rakonto en YouTube. Tiu ĉi rimedo povus esti bona aldono ankaŭ por la libroj de Esperanto-Asocio de Britio, donante plian valoron al la aĉetantoj.

Ĉi tiuj libroj estas bonegaj aldonaĵoj al la librokolekto de familioj, lernejoj kaj bibliotekoj. Ili taŭgas por infanoj inter 4–6 jaroj, kaj pro sia alta kvalito kaj alloga prezo ili reprezentas mirindan valoron por tiuj, kiuj serĉas edukajn kaj distrajn materialojn en Esperanto. Kvankam mia propra prefero estas La cent-etaĝa kosmoŝipo, mia infano plej ŝatas Ekster la kuniklejo, – kio montras, ke la vario en temoj kaj prezentoj proponas al ĉiu (ne nur infano!) ion specialan.

Mike Smith: La cent-etaĝa kosmoŝipo. 2021. ISBN 978-0-902756-45-8.

Jessica Meserve: Ekster la kuniklejo. 2022. ISBN 978-0-902756-47-2.

Alexandra Page: La fajrovulpo. 2022. ISBN 978-0-902756-51-9.

Lydia Corry: Lunkato kaj mi. 2022. ISBN 978-0-902756-53-3.

Ĉiuj kvar libroj estas eldonitaj de Esperanto-Asocio de Britio.