Jesuo fuĝis, sed reiris

Karaj MONAT'anoj, bonvolu skandi kun mi: „Jesuo fuĝas Egiptujon”: -x- x- x-x- Modela titolo. Se mi estus redaktoro de MONATO, mi inventus ĝin, se stulta aŭtoro ne trafis tiun intence iom antikvan kaj plene poezian tonon. Sed nun legeblas „en Egiption”, kvazaŭ mi verkis vojaĝraporton. Kaj aldonis la redaktoro „kiel ankaŭ aliaj nun fuĝas”. Ne. Tiu aldonaĵo plene ŝanĝas la intencon de la kontribuo. Jesuo fuĝis kaj reiris en la patrujon. Li alialande ne havis rajtojn (postuleblajn pere de bone salajritaj advokatoj) kaj ne pretendis ion alian ol portempan protekton. Kaj li ne intencis judigi Egiptujon! Li simple revenis kun la gepatroj post certa tempo, antaŭ ol iu provis integri lin en la egiptan kulturon!

Kaj eĉ pli domaĝe, MONATO ne aldonis nian ilustraĵon. Pene kune kun mia bilda kunlaborantino mi serĉis kaj trovis la punktpunkte trafan ilustraĵon. Kiom da vivotempo oni rajtas oferi al nerealigitaj pormonataj projektoj?

Franz-Georg Rössler
Germanio
La atenta leganto certe konstatis (MONATO 2015/12, p. 26), ke la koncerna artikolo okupas precize unu paĝon. Aldoni foton do signifus tranĉi la artikolon. Iafoje oni devas elekti inter du malbonoj.

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Franz-Georg Rössler el MONATO (www.monato.be).

Lasta adapto de tiu ĉi paĝo: 2020-07-07