Alklake konsiliĝi

Imagu, ekzemple, ke vi havas gravan aŭtoakcidenton dum vojaĝo eksterlande kaj via aŭto frakasiĝas; aŭ ke vi laboras por eksterlanda entrepreno, kiu ne pagas vian salajron; ke vi heredas eksterlandan nemoveblaĵon; aŭ ke vi geedziĝis al eksterlandano kaj ekhavis infanojn, sed volas divorci, kaj via partnero volas reiri al sia hejmlando, sed vi ne scias, kiuj leĝoj validas rilate alimenton, loĝadon de la infanoj.

Pro la internaciiĝo de la vivo pli kaj pli da homoj ekfrontas tiajn komplikajn jurajn situaciojn. Pro tio, en julio, la belga ministro pri justico, Stefaan De Clerck [stefán deklérk], prezentis novan eŭropan portalon en 22 lingvoj kun juraj informoj pri ĉiuj ŝtatoj. Ĝi direktiĝas precipe al advokatoj kaj juristoj, sed evidente ĉiu civitano povas konsulti ĝin.

Nuntempe tiuj paĝoj unuavice informas. Sed iom post iom ili estos ellaboritaj por interaktiva uzo, tiel ke ekzemple eblos trovi demandaron el fremda lando, tradukitan en via propra lingvo; eblos tiam plenigi kaj sendi ĝin, tiel ke ĝi alvenas en la lingvo de la koncerna administracio. De Clerck esperas, ke la portalo helpos harmoniigi la eŭropan juron.

Por konatiĝi kun la portalo sufiĉas alklaki: e-justice.europa.eu/home.do.

Ivo DURWAEL

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Ivo Durwael el MONATO (www.monato.be).

Lasta adapto de tiu ĉi paĝo: 2020-07-07