Ĉu nomo de strato estas ligita kun politiko? Dependas kie. Verŝajne, neordinara demando en ordinara mondo. Sed – ĉu Serbio apartenas al la ordinara mondo? Hm!
La strato, en kiu mi loĝas, fariĝis urba strato antaŭ jarcento kaj duono. Ĝi estas ordinara strato en la centro de Beogrado. Dum sia 140-jara historio ĝi ses fojojn ŝanĝis sian nomon. Similan sorton travivis multaj stratoj en Beogrado.
La unua nomo de mia strato estis Du Blankaj Kolomboj (1872-1896). Poste ĝi nomiĝis Svetogorska (laŭ la loko en Greklando, kie situas serba monaĥejo). Tiun nomon la strato portis ĝis 1922, de kiam ĝi nomiĝis Bitoljska (laŭ la nuntempa makedona urbo, kie en bataloj kun turkoj pereis multaj serbaj soldatoj).
Post 13 jaroj oni donis al la strato la nomon Ĵorĵa Klemencoa, tio estas la fama franca politikisto Georges Clemenceau. Kiam Germanio okupis Serbion, la strato portis inter 1943 kaj 1945 denove la nomon Svetogorska. Poste la nova komunista registaro ŝanĝis la nomon al tiu de juna komunista heroo Ivo Lola Ribar. La nomo restis ĝis 1997, ekde kiam la strato estas konata denove kiel Svetogorska.
Tiel stratnomo spegulas politikon.
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Dimitrije Janičić el MONATO (www.monato.be). Lasta adapto de tiu ĉi paĝo: 2020-07-07 |