Panjo-kampanjo

Aperis en marto apudvoja afiŝo en Pollando kun bildo pri Adolf Hitler. La afiŝo avertis kontraŭ abortigo, kiun Hitler permesis en la tiam okupitaj teritorioj de Pollando por laboristinoj devige venigitaj el orientaj landoj.

Legiĝis surafiŝa teksto: „Abortigo por polinoj – enkondukita de Hitler la 9an de marto 1943.” Apude videblis du fotoj montrantaj la restaĵojn de abortigitaj infanoj.

Forgesas

La kunorganizanto de la kampanjo „Elektu vivon” diris, ke en la nuna Pollando oni ofte forgesas, ke ĉi tiuj unuaj leĝoj pri abortigo datiĝas de la okupacio. Nun estas planataj pliaj afiŝoj suraŭtaj en lokoj, kie la instancoj ne permesas kontraŭ-abortigajn ekspoziciojn.

En Pollando en 2008 okazis 499 laŭleĝaj abortigoj, el kiuj 477 rilatis al naskotoj malsanaj.

Stanisław ŚMIGIELSKI/pg

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Stanisław Śmigielski/pg el MONATO (www.monato.be).

Lasta adapto de tiu ĉi paĝo: 2020-07-07