Dum la komunisma reĝimo en Albanio estis kondamnitaj al morto pro politikaj kialoj ĉirkaŭ 5600 viroj kaj pli ol 450 virinoj. Kontraste en Orienta Germanio, kun loĝantaro 15-oble pli granda, pereis samkiale nur 250 homoj.
Inter la ekzekutitoj estas eksaj partizanoj, oficiroj kaj altranguloj, inkluzive de membroj de la politburoo. La ŝtato disponis pri ok ekzekutejoj kaj tombejoj, kiuj restis sekretaj. Tial la familianoj ne sciis, kie estas entombigitaj la viktimoj, almenaŭ ne ĝis 1991, kiam falis la reĝimo.
Tiam, uzante informojn de eksaj policistoj, prokuroroj aŭ medicinistoj, parencoj komencis esplori la sorton de siaj familianoj. Tial estas malkovrita lastatempe amastombejo piede de la monto Dajt, tuj apud la albana ĉefurbo Tirano.
La registaro decidis starigi komisionon por trovi ĉiujn tombejojn kaj identigi la viktimojn. Krome, en la centro de Tirano, kie iam staris Stalin-monumento, oni konstruos rememorigilon pri la viktimoj de komunismo. Fine ekfunkcios nova instituto por studi la krimojn de komunismo.
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Bardhyl Selimi el MONATO (www.monato.be). Lasta adapto de tiu ĉi paĝo: 2020-07-07 |