Kiam komenciĝis la milito?

Naciismo fojfoje forgesigas la plej simplajn faktojn por iel valorigi sian propran nacion. Bardhyl Selimi asertas, ke la dua mondmilito komenciĝis per la invado en Albanion la 7an de aprilo 1939. Tamen en tiu tago Etiopio jam estis okupita de la italoj de post majo 1936 kaj daŭre rezistis. Ankaŭ Ĉeĥoslovakio estis jam okupita de la germanoj unu monaton antaŭ ol Mussolini perfortis Albanion.

En alia mondoparto dum tiu sama 7a de aprilo japanaj kaj ĉinaj armeoj estis batalantaj en Nanĉango, kie 100 000 militistoj mortis. Mi vetas, ke tie neniu rimarkis, ke kelkaj ĝendarmoj albanaj pafis al italaj militistoj en Durrës. La japana militistaro estis atakinta Ĉinion la 7an de julio 1937. Tiel tiu milito inter Japanio kaj Ĉinio, kiu daŭris ĝis la 2a de septembro 1945, estas la plej longa inter du landoj en la dua mondmilito. Ĉiuj tiuj invadoj kaj militoj, kaj ankaŭ la hispana interna milito, estis preludoj al la ĝenerala ekflagro, kiu ja komenciĝis la 1an de septembro 1939, kiam Germanio atakis Pollandon.

Thierry TAILHADES
Francio

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de Thierry Tailhades el MONATO (www.monato.be).

Lasta adapto de tiu ĉi paĝo: 2020-07-07