Prezoj prezidantaj

Aŭkciitaj estas objektoj, i.a. aŭtoj, komputiloj, fotiloj, mebloj kaj artaĵoj, ne plu bezonataj, kiuj apartenis al litovaj prezidantoj. La aĵojn iam pagis impostpagintoj de Litovio.

Partoprenis la prezidejan aŭkcion ĉ. 200 aĉetemuloj. Plej grandan intereson vekis la 20 aŭtomobiloj, aparte la grizkolora ĵipo „Nissan Patrol” de eksa prezidanto Algirdas Brazauskas. La prezo komenciĝis ĉe 900 eŭroj tamen fine atingis pli ol 8000.

Venditaj estas ankaŭ du rafinitaj lampoj, kiujn iam elektis la edzino de la elpostenigita prezidanto Rolandas Paksas. Ilin oni vendis kontraŭ pli ol 500 eŭroj. Eĉ nefunkciivan neĝo-forigilon akiris juna viro. Komence ĝi kostis 15 eŭrojn, sed la prezo altiĝis ĝis 460.

Kelkajn aĵojn oni ne volis, inkluzive de dormoĉambra meblaro. Tamen entute la aŭkcio rikoltis ĉ. 26 000 eŭrojn por la prezidejo kaj por la ŝtata kaso.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07