Vundaj vortoj

Litova komunismo, kun 50-jara historio, denove fariĝis tikla afero. Kiam dum kunsido de la Organizaĵo pri Sekureco kaj Kunlaboro en Eŭropo, okazinta en la litova ĉefurbo Vilnius en julio, greka parlamentano Konstantinos Alissandrakis eldiris sian opinion favoran al komunistoj, kolegoj el Litovio ne komprenis lin. Kaj ankoraŭ pli: la tiama litova parlamentestro Arūnas Valinskas diris, ke la parolado de la greka gasto ofendis Litovion.

Alissandrakis riproĉis al Litovio limigon de politika libereco kaj glorigon de nazikunlaborintoj. Li atentigis pri nuna malpermeso de komunistaj ideologio, simboloj kaj partio, dirante, ke komunistoj en Litovio estas enkarcerigitaj dum multaj jaroj. Li ekzempligis la estron de la iama komunista partio, kondamnita en januaro pro politika agado.

Ŝtata renverso

Laŭ la litova leĝaro, disvastigi, uzi aŭ montri flagojn aŭ aliajn simbolojn de nazia Germanio aŭ iama Sovetunio estas monpunotaj ĝis 300 eŭroj. Ekde 1991 la komunista partio en Litovio estas malpermesita, kiam partiestroj estis akuzitaj pri organizado de ŝtata renverso.

La parolo de la greka komunisto ofendis la litovan parlamentestron, kiu nomis la grekon „spirite blinda”, kaj diris, ke liaj vortoj favore al komunistoj ofendas la litovan popolon. Valinskas postulis, ke la prezidanto de la organizaĵo kaj delegitoj pardonpetu pro la vortoj de la greko, kvazaŭ en Litovio ne estus komunista okupacio kaj ĉiuj paroladoj pri krimoj de Stalin kaj viktimoj de komunismo estus nur fabeloj.

LAST

Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton: Artikolo de last el MONATO (www.monato.be).

Lasta adapto de tiu ĉi paĝo: 2020-07-07