KONGO
Ĉu Kabila-kabalo?
Post kiam Kabila
fariĝis prezidanto de Demokratia
Respubliko Kongo (DRK) en majo 1997,
malboniĝis la rilatoj kun Francio. Kabila,
kiu publike laŭdas tutafrikanismon kaj
volas, ke okcidentaj landoj nur akcesore
helpu afrikajn ŝtatojn, eĉ minacis, ke
DRK eliros el asocio de francparolantaj
landoj.
Pro tio Kabila ne sentis urĝan bezonon
viziti la okcidentan landon. Fakte oni devis
atendi militon en aŭgusto 1998 en orienta
DRK kontraŭ Ruando kaj Ugando, ĝis
normaliĝis rilatoj inter Francio kaj DRK.
Tiam oni invitis Kabila al kunveno de
afrikaj ŝtatestroj en Francio, okazonta en
novembro 1998.
Ekstermi
Kvin tagojn antaŭ la kunveno oni akuzis
Kabila pri pluraj krimoj. Laŭ komisiono
de Unuiĝintaj Nacioj pri homaj rajtoj,
Kabila malobservis la civitanajn rajtojn en sia
lando. Ankaŭ la registaro de Ruando
asertis, ke armeanoj de Kabila mortigis
kaj celis ekstermi tutsiojn (membrojn de
la Tutsi-tribo de Ruando, Ugando kaj
Burundio), kiuj militis en DRK en 1997.
Opoziciano loĝanta en Belgio pretendis,
ke Kabila amasbuĉis hutuojn (membrojn
de la Hutu-tribo rifuĝintajn el Ruando al
DRK en 1993).
Malgraŭ tio, Kabila estis akceptita en
Romo kaj de la papo kaj de la itala
registaro, kaj ankaŭ en Bruselo, antaŭ
ol partopreni kunvenon en Parizo. Kiam
oni demandis la francan prezidanton Chirac
[ŝirák], kial li akceptas homon
akuzitan pri tiom da krimoj, Chirac
respondis, ke lia devo ne estas akuzi, sed
serĉi pacon en Afriko.
Zandandu Ntomono ZOLA
Indekso
Lasta adapto de tiu ĉi paĝo:
8 julio 1999