LA 21A JARCENTO
Ĉu kalendarreformo estos bezonata?
La 4an de aprilo la homaro eniris la lastajn 1000 tagojn antaŭ la jarmilŝanĝo.
Lige kun tio, lastatempe aŭdiĝas pledoj de
astronomoj, ke okazu ampleksa kalendar-reformo ekde
la komenco de la nova jarmilo. Ili opinias, ke ĉiuj monatoj inkluzive
de februaro devas esti egaligitaj al 30 aŭ 31 tagoj,
kaj ke la ĉiujara determino de Pasko devas esti
adaptita al la plej aktualaj kapabloj de l' scienco (ĉi-jarcenton oni ja
sepfoje eraris ĉe la difino de tiu dato).
La astronomoj opinias, ke la ĝusta momento por iniciati tion estus la unua de
januaro 2001, ĉar la kalendara jarkalkulo ne
komenciĝis de nulo, sed de unu. Sekve 2000 jaroj
efektive estos pasintaj en 2001. Tio okazis pro la fakto, ke, en la 6a
jarcento, la monaĥo Dionizio Eksegia difinis la
naskiĝjaron de Kristo kiel la jaro 1. La dua
jarcento komenciĝis laŭ tiu kalkulo la 1an de januaro 101, kaj la tria jarmilo
alvenos la 1an de januaro 2001.
Sendepende de tio, la historiistoj atingis la konkludon, ke la tempo de la
naskiĝo de Kristo estis difinita tute malĝuste. Laŭ
la plej novaj scioj Jesuo naskiĝis en la jaro 7 antaŭ
Kristo.
La nova jarmilo ne koncernos ĉiujn
Neniu kalendara apartaĵo okazos por judoj la 1an de januaro 2000. La
jarkalkulo de la hebrea kalendaro ekas de la biblia
kreo de l' mondo en la jaro 3761 antaŭ Kristo. Tial
nun la judoj travivas la jaron 5758. La hebrea jaro komenciĝas aŭtune, ĝuste
en la tempo de la meza konjunkcio de la suno kaj luno
de l' monato Tiŝri. La hebrea tago estas same kiel
la kristana dividita je 24 horoj, tamen ĝi komenciĝas je la 18a
horo. Pro tio la Sankta Sabato komenciĝas vendrede
vespere kaj finiĝas sabate vespere.
La islama kalendaro komenciĝas ekde la elmigro de Mohamedo al Medina en la jaro
622 post Kristo. En tiu kazo, oni kalkulas laŭ
lunjaroj, kiuj havas 354 tagojn kaj 12 monatojn kun
alterne 29 kaj 30 tagoj. En ĉiu ciklo de 30 jaroj aperas 11 355-tagaj
superjaroj.
Plena kaoso regas en la hinda kalendaro. Pro la diverseco de gentoj kaj
kalkul-regularoj, ekzistas 20 ekirpunktoj por la
jarkalkulo. Krome eĉ en sama hinda kalendaro la
jaroj ne egalas, sed varias de 354 tagoj ĝis 366 tagoj.
La jarŝanĝo laŭ la Gregoria kalendaro, uzata en Okcidento, estas arbitre
elektita kaj baziĝas sur neniu astronomia okazaĵo.
Ĉe la romianoj la jaro iam komenciĝis la unuan de
marto, sed en la jaro 153 antaŭ Kristo la jarkomenco estis transigita al la
unua de januaro rezulte de multnombraj korektoj, kiuj
necesis pro la apliko de lunkalendaro.
Evgeni GEORGIEV
Indekso
Lasta adapto de tiu ĉi paĝo:
mardo 8 junio 1999 13:49:09