La rezulto, la plej signifa lavango-venko ekde 1931 kaj la plej spektakla konservativa kolapso de la jarcento, ankaŭ rekorde enparlamentigis virinojn - pli ol 100. Pro tio, i.a., oni parolas pri velura revolucio ... sensanga, sed tranĉa, fundamenta ŝanĝo en brita politika vivo. Precipe, tamen, la rezulto signifis triumfon por la plej juna brita ĉefministro de la jarcento: la 43-jaraĝa estro de la laborista partio, Toni Blair [Toni Ble].
Sendube venkis Blair unue, ĉar la popolon eknaŭzis konservativa koruptado ksenofobio kaj aroganteco, kaj due, ĉar Blair - kaj liaj antaŭuloj - iom post iom dekstrigis la iaman maldekstran, tiel ne plu elekteblan laboristan partion. Pluraj politikoj - ekz. pri privatigo kaj edukado - spegulas plejparte tiujn de la venkitaj konservativuloj.
Tamen jen tio, kio plej fidele spegulas la nunajn politikajn aspirojn de britoj: pli milda kaj humana konservatismo. Malgraŭ tio sekvos memevidente ŝanĝoj: la enormaj profitoj de privatigitaj, iamaj ŝtataj kompanioj impostiĝos, kaj - eventuale pli signife - antaŭvideblos pli kreaj, pli harmoniaj rilatoj kun la Eŭropa Unio. La nova ministro pri eksterlandaj aferoj, Robin Cook [Robn Kuk], promesis, ke Britio senrezerve subskribos en Amsterdamo la t.n. socian ĉarton, kiu garantias i.a. minimumajn dungito-rajtojn. Li atentigis, tamen, ke plej verŝajne Britio ne en 1999 aliĝos al la komuna eŭropa valuto, la eŭro, sed atendos - kiel postulis konservativuloj - du-tri jarojn.
Tiel ŝrumpis la konservativa partio, ke ĝi perdis ĉiujn siajn parlamentajn seĝojn en Skotlando; ĝi nun reprezentiĝas nek en Skotlando nek en Kimrio kaj fariĝis angla, ĉefe kampara partio. Kia bato por konservativuloj, kiuj ĝis la 70aj jaroj fieris ne nur pri sia ununacieco sed ankaŭ pri siaj ĝenerale malfermaj rilatoj kun Eŭropo kaj la cetera mondo.
Sub influo de la liberal-demokratoj Blair promesis konsideri proporcian voĉdonad-sistemon. Sendube grandiĝinta liberal-demokrata partio en la parlamento ne permesos al Blair forgesi sian promeson; plej verŝajne eĉ konservativuloj, kiuj dum jaroj ridindigis proporciecon, nun post sia humiligo ankaŭ subtenos balot-reformojn.
Politiko en Britio eniris novan eraon. La epoko de Margaret Thatcher [Taĉr], la 'fera virino,' kiu stampis sian personecon sur britan politikan vivon dum la 80aj jaroj, eniris la anglan lingvon kiel ,taĉerismo': vidotas, ĉu same enlingviĝos ,blerismo'.
Indekso