La Víbora (La vipuro) situas en la havana municipo 10 de Octubre (10a de oktobro) je proksimume 4 km for de la urbocentro. Kvankam la origina fondo okazis en 1628, la nunan nomon ĝi ricevis en la jaro 1728, kiam juna germana kuracisto decidis krei sian propran konsultejon en tiu ĉi loko.
Por reklami siajn kuracistajn servojn la germano dungis meksikan indiĝenon por pentri la konatan simbolon de Medicino sur la konsultejan muron. Tamen anstataŭ serpento – ŝajne pro nekono – la indiĝeno pentris meksikan vipuron, kaj tiu estas la kialo de la nomo.
Temas pri kvartalo ne tiel konata de historia vidpunkto, sed ĝi havas riĉajn detalojn; ekzemple, tie troviĝas grandegaj domoj kun impona arkitekturo, kiu montras la artan belecon de antikvaj metioj.
Krom la Nacia Sidejo de Kuba Esperanto-Asocio – kaj tre proksime de ĝi – en tiu ĉi kvartalo situas ankaŭ antaŭuniversitata lernejo kaj la kulturdomo de la municipo, kie plurfoje okazis eventoj pri Esperanto. En tiu kulturejo ofte prezentiĝas kubaj muzikistoj.
Kvankam troviĝanta iom for de la urbocentro La Vipuro diskonigas ne nur la kuban, sed ankaŭ la Esperantan kulturon en rilato kun la komunumo.
| Tiu ĉi teksto aperis en la presita kaj en la PDF-forma versioj de Monato en la jarkolekto 2019, numero 04, p. 18. |
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Ariadna García Gutiérrez el MONATO (www.monato.be). Lasta adapto de tiu ĉi paĝo: 2020-07-07 |